1.
एक वेगळी गंमत असते एकांताची;
केंव्हा केंव्हा ऐकू येते धून मनाची.
चुकला होता मैत्रीचा तो निर्णय कर्णा,
सुज्ञ मनाने घाई केली प्रतिशोधाची.
रस्त्याच्या बाजूला ज्यांचे अंथरुण नि घर;
त्यांना कुठली खुर्ची असते आरामाची?
माणूस की विदूषक मेला...कळले नाही;
गर्दी होती शोकसभेला हसणा-यांची.
गोड गोजरी दोन मुलं अन सुंदर पत्नी;
तरी कशाला उणीव सलते तू नसल्याची.
निरूत्तराच्या प्रश्नांनाही हाताळावे;
कुठली ना कुठली चावी असते कुलपाची.
2.
जिथे चूक झाली...स्वत:ची निघावी;
नशीबा, तुझी चूक नव्हती,नसावी!
इथे कोण मोठा, कशाने, कितीसा?
जगी फक्त गणना मनुष्यात व्हावी.
खरे बोलतांना किती त्रास होतो;
अशाने उगा बोबडीही वळावी.
समाजात असतो असा एक पाढा;
'मला मान मोठा, प्रतिष्ठा मिळावी!'
'विठू'आज स्वप्नात येतो कुणाच्या;
मला लागलेली समाधी असावी!
कुणाला कुणाचे इथे भान आहे?
कुणाला कुणाची इथे हाक जावी?
जगावे असे संयमी माणसाने;
मना सज्जनाचा! अशी दाद यावी.
______________________________
इंद्रजित भीमराव उगले, बीड
८९८३६४४२३४
अभिनंदन ...अभिनंदन
उत्तर द्याहटवा---आगे बढो