_________________________शिल्पा देशपांडे____दोन गझला_______________

1.

आभाळ आसवांचे झाले भकास आता;

डोळ्यात पेरलेले दुष्काळभास आता.

पाऊस तांडवाची देतोय आज नांदी;

पान्हावल्या घनांचा संपेल श्वास आता.

सांडून प्रेम त्याने भरला उगीच प्याला;

मदिरेस आसवांचा येईल वास आता.

कानात बासरीच्या कान्हा हळू म्हणाला;

प्राणात राधिकेच्या घुमतोय रास आता.

संसार चंद्रमौळी...अंगात ऊनचोळी;

ऐन्यात भाकरीचे होतात भास आता.

देहास शोष आणि तेजाब आठवांचा;

आत्म्यास या गजलची लागेल प्यास आता.

2.

गल्लीत का फुलांनी गर्दी अमाप केली;

स्वप्ने खरीदणारा आला पुन्हा मवाली.

आता लपेट मजला हळूवार भोवताली;

मी तलम लाट बनुनी दर्यात तव निमाली.

परतून जा विजांनो नुरली अता गुलामी;

मी पापण्यात जपल्या जलबाव-या पखाली.

खाली अनंत पाणी वर मेघ दाटलेले;

ही कोणत्या पुराची बाधा नदीस झाली.

पाठीस सैल करता क्षितीजावरी नभाने;

टाचांस उंच करूनी धरणी मिठीत आली.

नाही कठीण तितके एकांत शोधणेही;

कोलाहलातही मी तादात्म्य पावलेली.

______________________________

शिल्पा देशपांडे,

D- 1004, पाम बीच रेसिडेन्सी,

प्लाॅट नं. २३-२९, सेक्टर-४,

नेरुळ, नवी मुंबई 400706

मोबाईल नं. 9820263223