_______________________निशब्द देव____पाच गझला_______________

1.

एवढा कंटाळलो हेटाळणीला;

हासलो अन् बंद केले पापणीला.

सिद्ध कर दुष्काळ आहे जाणिवांचा;

आसवे येतील मग पडताळणीला.

आठवण होते तुझी हटकून आई;

पाहतो जेंव्हा नभी मी चांदणीला.

सारखे जोडू नको तू हात तेथे;

देव ही कंटाळतो रे मागणीला.

ऐकले की झोप ही चोरीस जाते;

चंद्र आहे ठेवला मी राखणीला.

पांढ-या वस्त्रात दिसले शेत जेंव्हा;

खूप आल्या सांत्वना ओवाळणीला.

तू कशाचे बीज होते पेरलेले;

काढतो जखमाच हल्ली कापणीला.

2.

दु:ख जेंव्हा भरजरी होते;

तू दिल्याची खातरी होते!

मंदिरी मी जात नाही पण

संकटाची…पायरी होते!

जीवनाने शिकविले मजला;

जखम जखमेने बरी होते!

पावसा खेळून जातो तू ;

अन पिकांची मस्करी होते.

घाम बापाचा घरी येतो;

मग चुलीवर भाकरी होते!

3.

मी तुझ्या छायेत दु:खा छान आहे;

खुद्द जखमांचे मला वरदान आहे.

श्वास घेतांना मला कळलेच नाही;

की हवा सुद्धा इथे बेमान आहे.

वाकलो देवापुढे आजन्म मीही

विसरुनी गेलो…मलाही मान आहे.

श्वास घेण्याचे शिळे चालूच चाळे;

भूक जगण्याची किती हैवान आहे.

जीवनाची वाट मी चुकणार नाही;

हेच रस्त्याचे मला वरदान आहे.

बाप जातांना म्हणाला ऐक देवा

वेदनेचा अर्थ स्वाभिमान आहे .

जेवढे माजायचे माजून घे, पण

जीवना,मृत्यू तुझा यजमान आहे!

4.

सरळ साधा अन् कुणाही सारखा;

शुभ्र आहे मी कपाशीसारखा.

काय बोलू मी दग्यावरती तुझ्या?

गोड आहे पुरणपोळीसारखा!

आठवण आलीच ताई जर तुझी;

श्वास मी बांधेन राखी सारखा!

रात्र  नाही येत प्रेमाची कधी;

स्पर्श होतो देहविक्रीसारखा.

एवढ्या जखमा जमा झाल्यात की

मी मला वाटे तिजोरीसारखा.

रूप ते ...अन तोच तेजस्वीपणा

सूर्य दिसतो ना शिवाजीसारखा?

विठ्ठ्ला इतकेच दु:खाला जपा;

जन्म मग वाटेल वारीसारखा.

5.

का असा खेळून जातो काळ एखादा;

रोज दिसतो चेहरा घायाळ एखादा.

नेहमी ती पाहते फोटोत नव-याला;

राहतो नयनी भिजत दुष्काळ एखादा.

जागती खाल्ल्या मिठाला श्वापदे सारी;

गाळतो नेताच येथे लाळ एखादा!

हे खरे का रे तुझ्यासोबत तुकारामा,

पंगतीला येतसे नाठाळ एखादा?

बघत असते वाट आई आश्रमामध्ये  ,

करत असतो रोज टाळाटाळ एखादा.

वाचण्यासाठी कथा ओसाड प्रेमाची;

तू कधी तर श्वास माझा चाळ एखादा.

प्रेम करतो आजही तितकेच आईवर;

अंतरी असणार माझ्या बाळ एखादा. 

खायला उठते सदा शहरातली शांती;

गाव आवडतो मला वाचाळ एखादा!

________________________________