1.

कबूल आहे नसायचो मी घरात बाळा;

असायचा मात्र जीव माझा तुझ्यात बाळा.

अपूर्ण राहू नये तुझी कोणतीच इच्छा;

म्हणून राहायचो जुन्याशा बुटात बाळा.

तुझ्याचसाठी करायचो कष्ट एवढे मी;

भुलून गेलास सर्व एका क्षणात बाळा.

तुला जरी वाटतोय रे मी नकोनकोसा;

सदैव तू राहशील माझ्या मनात बाळा.

"सुखात राहा सदैव तू" हीच एक इच्छा;

कसाबसा मी जगेल वृद्धाश्रमात बाळा.

2.

इजा जाम झाली तुलाही,मलाही;

तरी मौज आली तुलाही,मलाही.

तिचे एवढे हाल झालेत की ती,

'कसाई' म्हणाली तुलाही,मलाही. 

किती काळ गेला तरी वेढुनी त्या;

प्रथा आणि चाली तुलाही,मलाही.

इथे भेकडांची उभी फौज आहे;

नकोशा मशाली तुलाही,मलाही.

"मुलांनो, जपा पोसणाऱ्या भुमीला"

धरा साद घाली तुलाही,मलाही.

पुरेपूर घ्यावी मजा जिंदगीची;

जराशी मिळाली तुलाही,मलाही.

स्वतःच्या नशीबास आकार देऊ;

अता कोण वाली तुलाही,मलाही?

3.

येई झुळूक अन मन वा-यासवे झुले;

स्मृति जागती अशा, जैशी बहरती फुले.

समजू नकोस गं, अबला या जगात तू;

धरती तुझीच अन बघ हे गगनही खुले.

कार्टून्सच्या जगी रमण्याऐवजी जरा;

न्याहाळतील का चांदोबास ही मुले?

आई-वडील तर कामावरच दिवसभर;

हितगुज कसे बरे मग करणार सानुले? 

मोहात ना कधी माझा जीव गुंतला;

हे शब्द सोबती बाकी काय आपुले ? 

______________________________